தேசிங்கு பெரியசாமி இயக்கத்தில் சிம்பு நடிப்பில் ‘எஸ்டிஆர் 48’ உருவாகவுள்ளதாக கடந்த ஓராண்டுக்கு முன்பாகவே அறிவிப்பு வெளியானது. ஆனால் இப்படத்தின் பணிகள் தற்போது வரை துவங்கவில்லை. இதனால் சிம்பு ரசிகர்கள் கடுமையான அப்செட்டில் உள்ளனர்.
உலக நாயகனின் ராஜ் கமல் பிலிம்ஸ் தயாரிப்பில் ‘எஸ்டிஆர் 48’ படம் உருவாக இருப்பதாக அதிகாரப்பூர்வ அறிவிப்பு வெளியானது. கமல் – சிம்பு காம்போ இணைவதாக வெளியான அறிவிப்பு கோலிவுட் வட்டாரத்தில் எக்கச்சக்கமான எதிர்பார்ப்பு எழுந்தது. இதனால் இப்படம் மிகப்பெரிய படைப்பாக உருவாகும் என எதிர்பார்க்கப்பட்டது. ‘கண்ணும் கண்ணும் கொள்ளையடித்தால்’ படத்தின் வாயிலாக தேசிங்கு பெரியசாமி ‘எஸ்டிஆர் 48’ படத்தினை இயக்குவதாக அறிவிக்கப்பட்டது.
ஆனால் பட்ஜெட் காரணமாக தற்போது வரை ‘எஸ்டிஆர் 48’ பணிகள் துவங்கவில்லை. இதனிடையில் ராஜ் கமல் பிலிம்ஸ் தயாரிப்பு நிறுவனம் இப்படத்தினை கைவிட்டு விட்டதாகவும் தகவல்கள் வெளியானது. இந்நிலையில் ‘எஸ்டிஆர் 48’ படத்திற்காக சிம்பு அதிரடி முடிவு ஒன்றை எடுத்துள்ளதாக கூறப்படுகிறது. அதன்படி இப்படத்தினை சிம்புவே தயாரிக்க முடிவெடுத்துள்ளதாக சினிமா வட்டாரங்களில் இருந்து செய்திகள் வெளியாகியுள்ளன.
